ಸೂರ್ಯಕುಮಾರ್ ಯಾದವ್ ನೇತೃತ್ವದ ಟೀಂ ಇಂಡಿಯಾ ಕಾಂಗರೂ ನಾಡಿನಲ್ಲಿ ಅಗ್ನಿಪರೀಕ್ಷೆಗೆ ಸಜ್ಜು!
ಏಕದಿನ ಸರಣಿ ಮುಕ್ತಾಯ — ಈಗ ಟಿ20 ಕ್ರಿಕೆಟ್‌ಗೆ ವೇದಿಕೆ ಸಿದ್ಧ
ಬೆಂಗಳೂರು:
ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ ಮೂರು ಪಂದ್ಯಗಳ ಏಕದಿನ ಸರಣಿ ಮುಕ್ತಾಯಗೊಂಡಿದ್ದು, ಈಗ ಎಲ್ಲಾ ಕಣ್ಣುಗಳು ಟಿ20 ಸರಣಿಯತ್ತ ನೆಟ್ಟಿವೆ. ಶೂಭ್‌ಮನ್ ಗಿಲ್ ನೇತೃತ್ವದ ಟೀಂ ಇಂಡಿಯಾ 1-2 ಅಂತರದಲ್ಲಿ ಏಕದಿನ ಸರಣಿಯನ್ನು ಕೈಚೆಲ್ಲಿದರೂ, ಈ ಬಾರಿ ಟಿ20 ಸರಣಿಯನ್ನು ಗೆಲ್ಲಲು ಬೃಹತ್ ರಣತಂತ್ರ ರೂಪಿಸಿದೆ.
ಅಕ್ಟೋಬರ್ 29ರಿಂದ ಟಿ20 ಸರಣಿ ಆರಂಭ
ಐದು ಪಂದ್ಯಗಳ ಟಿ20 ಸರಣಿ ಇದೇ ಅಕ್ಟೋಬರ್ 29ರಿಂದ ಆರಂಭವಾಗಲಿದೆ. ಮೊದಲ ಪಂದ್ಯಕ್ಕೆ ಆಸ್ಟ್ರೇಲಿಯಾದ ಕೆನ್‌ಬೆರಾ ಆತಿಥ್ಯ ವಹಿಸಿದೆ. ಈ ಬಾರಿ ಚುಟುಕು ಕ್ರಿಕೆಟ್‌ನಲ್ಲಿ ಭಾರತ ತನ್ನ ಶಕ್ತಿ ಪ್ರದರ್ಶನ ನೀಡಲು ಸಜ್ಜಾಗಿದೆ.
ಕಾಂಗರೂ ನಾಡಿನಲ್ಲಿ ಸೂರ್ಯ ಪಡೆಗೆ ಅಗ್ನಿಪರೀಕ್ಷೆ
ಟಿ20 ಸರಣಿಯಲ್ಲಿ ತಂಡದ ನಾಯಕರಾಗಿ ಸೂರ್ಯಕುಮಾರ್ ಯಾದವ್ ನಾಯಕತ್ವ ವಹಿಸಲಿದ್ದಾರೆ. ಕಳೆದ ತಿಂಗಳು ಏಷ್ಯಾ ಕಪ್ ಗೆದ್ದ ಉತ್ಸಾಹದಲ್ಲಿರುವ ಟೀಂ ಇಂಡಿಯಾ, ಆಸ್ಟ್ರೇಲಿಯಾದ ನೆಲದಲ್ಲಿ ಬಲಿಷ್ಠ ಆತಿಥೇಯರನ್ನು ಮಣಿಸಲು ಸಜ್ಜಾಗಿದೆ.
ಪಂದ್ಯ ಆರಂಭದ ಸಮಯದಲ್ಲಿ ಬದಲಾವಣೆ
ಈ ಸರಣಿ ಆಸ್ಟ್ರೇಲಿಯಾದಲ್ಲಿ ನಡೆಯುತ್ತಿರುವುದರಿಂದ ಪಂದ್ಯ ಆರಂಭದ ವೇಳಾಪಟ್ಟಿಯಲ್ಲೂ ಬದಲಾವಣೆ ಆಗಿದೆ.
ಏಕದಿನ ಸರಣಿಗಳು ಬೆಳಗ್ಗೆ 9 ಗಂಟೆಗೆ ಆರಂಭವಾಗುತ್ತಿದ್ದರೆ, ಇದೀಗ ಟಿ20 ಪಂದ್ಯಗಳು ಆಸ್ಟ್ರೇಲಿಯಾದಲ್ಲಿ ಸಂಜೆ 7.15ಕ್ಕೆ ಪ್ರಾರಂಭವಾಗಲಿವೆ.
ಅಂದರೆ ಭಾರತೀಯ ಕಾಲಮಾನ ಪ್ರಕಾರ ಮಧ್ಯಾಹ್ನ 1.45ರಿಂದ ಟಿ20 ಪಂದ್ಯಗಳ ನೇರ ಪ್ರಸಾರ ನಡೆಯಲಿದೆ.
ಟಿ20 ಕಪ್ ಗೆಲ್ಲಲು ಟೀಂ ಇಂಡಿಯಾ ತುದಿಗಾಲಲ್ಲಿ
ಹಾಲಿ ಟಿ20 ಚಾಂಪಿಯನ್ ಭಾರತ ತಂಡವು ಇತ್ತೀಚಿನ ಸರಣಿಗಳಲ್ಲಿ ನಿರಂತರವಾಗಿ ಯಶಸ್ಸು ದಾಖಲಿಸುತ್ತಿದ್ದು, ಕಾಂಗರೂ ನಾಡಿನ ಪಿಚ್‌ಗಳಲ್ಲಿ ಸಹ ಅದೇ ಹಾದಿ ಮುಂದುವರಿಸಲು ದೃಢ ನಿಶ್ಚಯಗೊಂಡಿದೆ. ಆಸ್ಟ್ರೇಲಿಯಾದ ಬಲಿಷ್ಠ ಬೌಲಿಂಗ್ ಅಟಾಕ್ ಎದುರು ಸೂರ್ಯಕುಮಾರ್ ಪಡೆ ತನ್ನ ಅಬ್ಬರ ತೋರಲು ಕಾತರದಲ್ಲಿದೆ.
